የፕሮቴስታንት እምነት የተጀመረው በ16ኛው ክ/ዘመን በማርቲን ሉተር እና በእርሱ ሰዓት በነበሩ በእነ ካልቪን በእነ ዚውንግሊ ቢሆንም ቀደም ብሎ ግን በአንዳንድ ሰዎች ለምሳሌ በእነ ጆን ዊክሊፍም የተሞከረ እንደሆነ ይነገራል። የፕሮቴስታንት መመስራት ዋናው ምክንያት በሰዓቱ በካቶሊክ ቤተ ክርስቲያን ውስጥ በነበሩ አንዳንድ ስህተት ትምሕርቶች ምክኒያት ነው። በሰዓቱ ካቶሊክ ጥቂት ስህተቶችን በማከናወኗ ለሉተር በር ሆነውና አረምኩ ብሎ ጭራሽ ዶግማን የሚያፋልሱ ትምሕርቶችን ይዞ ብቅ አለ። ታድያ ግን ሉተር በዛ ሰዓት ሲነሳ አሁን ላይ እንዳሉት የፕሮቴስታንት ቡድኖች በስህተት ትምሕርት ብቻ የታጨቀም አልነበረም። ምናልባትም አስተውለን ብንመለከት ማርቲን ሉተር አሁን ላይ ካሉት ፕሮቴስታንቶች ይልቅ ወደ እኛ ሳይቀርብ አይቀርም። አሁን ላይ ያለው የፕሮቴስታንት ትምሕርት እጅግ በብዙ ኑፋቄዎች የታጨቀ ከመሆኑ የተነሳ አንድ የግብጽ መምህር ምን ብሏል "በታሪክ ውስጥ በክርስትና ስም ከተነሱ መናፍቃን ውስጥ እንደ ፕሮቴስታንት በብዙ ኑፋቄ የታጨቀ የለም።" ፕሮቴስታንቶች መጽሐፍ ቅዱስን ይወዳሉ ግን አብዛኛዎቹ የተወሰኑ ጥቅሶችን ከመሸምደድ በዘለለ ውስጡን አያውቁትም። ይህ ብቻ ሳይሆን ሌላው ትልቁ ድክመታቸው መጽሐፍ ቅዱስን ሲወዱና ሲቀበሉ ሙሉ በሙሉ አይደለም። ሮሜና ገላትያ ላይ ተንጠልጥሎ የመቅረት ነገር ይታይባቸዋል። እነሱን መሰረት በማድረግ ሌላ ከእነሱ የተለዩ ሌሎች ሃሳቦችን ሌሎች መጽሐፍት ላይ ሲመለከቱ ለመቀበል ይከብዳቸዋል። ይህም ፓስተሮቻቸው በእነርሱ ላይ ያሳረፉት ከባድ እስራት ነው። ምክኒያቱም ሮሜና ገላትያ ከአውዱ ውጪ በሆነ መልኩ ይረዱታልና ነው። ይህንን መልስ በምንሰጥባቸው ጽሑፎቻችን ላይ እያስታወስናችሁ እንሄዳለን። ስለዚህም የፕሮቴስታንት ቡድኖች ኑፋቄ ውስጥ ናቸውና በእውነት "ኑፋቄ ደግሞ ያጠፋል" ተብሎ ተጽፏልና እነዚህ ወንድሞቻችን ለሚያነሷቸው ጥያቄዎች ረድኤተ እግዚአብሔርን አጋዥ አድርገን መልስ እንሰጣለን።